اثناء تجولي حول العالم (في النت فقط) وجدت مجموعة من الصور للصين وصراحة صور رائعة وجميلة لبلاد الصين, الصين من البلاد الجميلة ولكن لو يبطلون المأكولات الغريبة حقتهم يمكن الواحد يفكر يسافر لهم ,,تحس انهم يطبخون اي شيء حي او يمشي .لذلك اذا  احد فكر يسافر لهم هناك انا انصحه انه يأخذ اكله وشربه معه في حقيبة السفر,لأنك بتموت جوع او انك بتأكل اكل ماتدري وش هو؟ الان دعونا  نسافر الى بلاد الصين.

 

 

شوفو هذا الجمال الرائع مادري وين البلديةعنهم كيف بانين فوق بعضهم.ولانسيت هم ماعندهم سيارات يعني لو هذة المدينة او القرية عندنا كان تلاقي بين كل بيت وبيت اربع سيارات خمس سيارات مع باص ابو ريالين المشكلة عندنا انك ماتحصل في البيت الا واحد او اثنين طيب ليش كل هالسيارات الي واقفه عند كل بيت .لا صراحة روعه شوفو البيت الثالث الي من جهة اليمين ماشاء الله,,امزح معاكم كلها مثل بعض بس اختلافات بسيطه.. طبعا وانا اشاهد هذه المنازل الجميلة خطر على بالي اني اشغل سياراتي واسافر  الان الى الصين بس مثل ماقلت لكم اكلهم يخوف  يطبخون اي شي يمشي او يتحرك وبعدين مافي مواقف عند كل بيت يعني بلاش السفريه.

 

 

هذة نفس الصورة الي فوق بس وقت الظهر, طبعا كيف عرفت؟ لان في ادخنه طالعه من المنازل وهذا يؤكد ان الصورة التقطت وقت الظهر وهو وقت طبخ وجبه الغداء. طبعا اي شي يمر من عند بابهم يذبحوه ويطبخوه يعني توقع ان الغداء قط محشي بالفئران,همتارو مشوي او ضفدع بنكه الكاري, انت وحظك  بس خلونا من الاكل وشوفو جمال تصاعد الادخنه سبحان الله,شوفو البيت الخامس من جهة اليمن من فوق. شوفو كثرة الادخنه الصاعده منه,طبعا اتوقع ان البيت احترق مو طبخ بس صدقوني ادخنه نقيه وصافية  ولا تضر بالصحة ويمكن تكون علاج للربو.

 

 

ماذا اقول,وماذا عساني اقول. سبحان الله مبدع هذا الكون,شوفو.شوفو مافي سيارات مافي شاحنات. في زوارق وفي قوارب.وفي ضفادع ..اوووه معليش شوفو الشارع المائي الذي يقطع بين المنازل نظيف مافيه حفر او مطبات,انا لو بس اعرف اقول سلام عليكم بالصيني كان سافرت للصين.

 

 

هذة صورة مقربة للمنزل الي قلت لكم عليه قبل شوي الي هو الخامس من جهة اليمن من فوق ,بس لما قربو الصورة صار البيت الخامس من جهة اليمن من اسفل, شوفو الادخنه وشوفو المساحات الخضراء,يعني احيانا يتمنى الواحد لو ان له خال او عم صيني او جده او جد علشان يزورهم كل سنة ويكسب اجر صلة الرحم ويكسب اجر في نفسه يشوف العالم ويتفكر في خلق الله , اتوقع لو اروح هناك راح اقول سبحان الله كل دقيقة ,اما هنا راح اقول لا حول ولاقوة الا بالله وحسبي الله ونعم الوكيل.

 

 

هذا الجسر حقهم يعني وش تتوقعون راح يدخل من تحت هذا الجسر اكيد قارب وش احليله صغير وانيق ,شوفو انعكاس المنظرعلى سطح النهر ,سبحان الله هذا النهر اسمه نهر شاونشين .وهو يصب من نهر شمال المدينة الى جنوبها …والله هالاسم من راسي ويصب من الشمال والجنوب ايضا من رأسي لاصحه له  بس اتوقع ان الاسم قريب من الحقيقة, بس للاسف في صورة سيارات فوق الجسر في جهه اليمين,وهذا يخلني افكر اغير نظرتي فيهم نشوف الصورة الي بعدها.

 

 

شايفين الاثنين الي يمشون على الجسر,,هؤلاء من اهل القرية واسمهم نفس اسم النهر الي قلته قبل شوي شاونشين.طبعا  في الصين لهم طريقه في تقسيم الاسماء الزوج ياخذ اول ثلاث حروف والزوجه تاخذ باقي الحروف يعني  واحد ياخذ(شاو) والثاني ياخذ (نشين) طيب وش يبقى لعيالهم لو كل واحد اخذا له اسم,ماعلينا هم يتفاهمون. عيالهم وهم ادرى بهم.

 

 

ماشاء الله على الجمال الرائع,خضره,وماء,و….ماء وخضره مرة ثانية, هذة الصورة اذا ماخاب ظني هو وقت العصر راح تسألوني كيف عرفت؟ وراح اقلكم.

لأني وانا قاعد اكتب تحت هذة الصورة اذن الظهر عندنا ومعا مراعاة فارق التوقيت بيننا وبينهم  حسبتها واكتشفت ان الوقت الي عندهم  هو وقت العصر .وبهذا فان الصور اخذت وقت العصر,معا مراعاة فارق التوقيت. يعني بمعنى اخر ونحسبها بطريقة المعادلات الرياضية اذا كان (س) لايساوي (ص) و(ص) لا يساوي (س)  فأن (س) و(ص) هم اولاد عم.والله اعلم

 

 

نفس الصورة الي فوق بس بالمقلوب.

يعني (ص) لايساوي (س)

 

 

منظر جمالي اخر للصين

 

 

هذه المنازل الى باللون البرتقالي اتوقع انها استراحات لا نها بعيده عن المنازل الاخرى.

 

اتمنى ان تكونوا استمتعتم بهذه الرحلة البسيطه الى بلاد الصين

 

::::: انتهت الرحلة ::::